Memo un den Tour de Luxembourg à Cheval 08.-15.08.1997
De 97er Tour de Luxembourg um Päerd huet seng
Geschicht scho geschriwwen an all Reider, den seng Plaquette op
sengem Päerd seng Boxendir genélt huet, kann dorop
houffreg sin. 7 Deeg laang duerch d'Land ze fueren as eng Erausfuerderung
an eng Leeschtung fir de Reider a säi Päerd. Op nët
manner wéi ongeféier 250 km begleed dat treit Déier
säi Meeschter an dréit hien virun iwwer Stach a Stehen,
biegop a biergof.
Op dem Tour de Luxembourg à Cheval begéint
een sech. Jonker, an där déi nach jonk bliwwe sin,
Kollege vun de Jore virdrun an och nei Reider. Sou as den 31.
TDL dëst Joër zu Käerch fortgaangen. No engem offiziellen
Départ sin déi 2 Gruppen mat ongeféier 30
Reider an de Bësch fortgezun a jhiddereen huet lues a lues
den Alldag hannert sech gelooss a vergiess. T'as eng Vakanz wéi
keng, ganz op säi Päerd agestallt, eng Woch ënnerwee
ze sin., Um Päerd gët gepotert, philosophéiert,
gesongen a gegeckst a munchmol och gerascht. Well den Alldag vum
Tour huet säin eegene Rhythmus. Moies heescht et mat Zäit
sech oprappe fir säi Béischt ze fidderen. No engem
gudde Kaffi as een dann endlech ganz waakreg. Gläich drop
gët gesuedelt an déi éischt Halschent vun der
Dagesétappe an Ugrëff geholl. Mëtteg gëtt
am Bësch gemeet, dat wëll nët heeschen dat een
dofir manner verwinnt gët. D'Kichenéquipe weess wat
en Tourereider brauch. E komplette Menu gët do zervéiert
a munchereen huet sech dobäi schon iwwerlueden.Eng Paus fir
d'Päerd as nët verkéiert, besonnesch bei der
dréckender Hëtzt vun dësem Joër. Nomëttes
geet et wieder fir eppes méi wéi 2 Stonnen. Iwwert
d'Nuecht gin d'Päerd op enger Wiss ënnerbruecht. Dat
as wéi vill Aneres mat vill Suergfallt scho wochelaang
virum Tour geplangt. Fir den Après gët d'Reittenue
emol ofgeluegt. Bei engem gemittlechen Owesiessen gin d'Erliewnisser
vum Dag ausgetosch an duerno gët sech zesummen ameséiert
beim Pättchen, bei Danzmusék, beim Kaartespillen...
Wann een dann zefridde mat sech an der Welt d'Tirette vu sengem
Schlofsaack zouzitt, brauch keen engem ze fléiwe fir ze
schlofen (dat as och méiglech wann een nët grad en
Noper erwëscht huet, deen nach e puer Kouërten ze séen
huet).
Wat et heescht um Tour sin, sech em säi Päerd
këmmeren, am Gutland iwwer sandeg Wéer galoppéieren,
am Éisléck vun enger Kopp op déi aner klammen,
sech mat Reiderkollegen ameséieren an zesumme laachen,
dat alles weess een wann ee selwer um Tour derbäi as. Eppes
steet fest, et mecht vill Spaass a wéi mir eis um Schlussiessen
« Äddi » gesot hun, war et mam Gedanken
eis d'nächst Joër um Tour erëmzegesin.
Triny Gorza-Bartholomé
